Traduzione in cimbro
Dar aesór Marchiori hatt bokhennt di pürgermaistarn vo Pedemonte, Magasa un Valvestino
Fokus übar tème boda ågian in Kamöündar nidar nåmp in konfì vodar Provìntz
[Cimbro] Dar provintziàl asesór afte politike vorz haus, demanio un autonomì Simone Marchiori hatt bokhennt an menta atz 8 von abrèl di istitutzionàln vortretar von Kamöündar nidar nåmp in konfì vodar Provìntz, Pademonte (in di provìntz vo Vicenza, Magasa un Valvestino (poade in di provìntz vo Brescia).
Dar trèff iz gest an okasiong zo reda übar in sèll boda håm gevorst dise Kamöündar, zo soina bidar inngevånk in di Redjong Trentino Südtiról, drinn in da autonome Provìntz vo Tria, nå bazta auzmacht dar art. 132 vodar Kostitutziong un darzuar vürzolega a drai sachandarn boda ågian in prodjèkte zo pintase mearar pinn Trentino.
“Bar vennenaz in a zait boda khint bidar genump in hent dar Statùtt vo Autonomì un disar iz dar djüst momént vürzotraga in tèma zo kheara innzonemma di kamöündar vo Pedemonte, Magasa e Valvestino boda soin hèrta gest toal vodar autonome Provìntz vo Tria” asó hatta khött dar asesór Marchiori ånemmante di pürgermaistarn Roberto Carotta (Pedemonte), Davide Pace (Valvestino) un Federico Venturini (Magasa), disan dar asesór hatten khött ke dise soinz tème boma sait drå drauzoreda un ke da soin sa khent gemacht bizzan dar asesören vor di lånt emtar Giulia Zanotelli un in vorsitzar vodar Provìntz Maurizio Fugatti.
In trèff hatta genump toal darAlberto Baldessari von Komitàtt "Torniamo in Trentino" o un dar provintziàl djeneràl diridjént von Åmt vor öffentleschen arbatn Mario Monaco, pitt imen izta khent draugeredet zo maga machan a kublpån boda get vo Pedemonte atz Lusérn un an naüng bege Valvestino-Bondone.
Di vürlegom zo kheara bidrùmm in Trentino håm ågeheft pinn referendum von djar 2008, durch dise referendum di laüt von drai kamöündar, in alle soinsa mindar baz tausankh, håm gehatt khött ke da bölln soin untar dar provìntz vo Tria, gedenkhante ke vor djarhundart soinsa hèrta gest toal von österraichege-ungar Khoasarraich un in di zait zbisnen in zboa bèltkriagar untar dar Provìntz vo Tria, vo disarn soinsa khent vortgenump a fòrtza ’z djar 1929 (Pedemonte) un ’z djar 1934 (Magasa e Valvestino).
Darzuar dar gekhennaten stòrdja in di drai kamöündar soinda no sachandarn vodar trentinar vüarom azpe dar tavolar redjister anvétze baz dar katasto. Vor bazta ågeat ’z rècht o Magasa un Valvestino gehöarn in tribunàl vo Rovrait un in djuditze vo Patze vo Riva aftn Gardasea.
Pedemonte un Casotto haüt fratziongen von gelaichege Kamòu boda soin aftn konfì pitt Lusérn håm, anvétze, alte zimbresche burtzan asó azpe ma sek in di låntnem un in di zimbarn börtar inngemischt in vitzentinar dialèkt.
In trèff izta auvarkhent ke di redjongen Lombardia un Veneto håm sa khött z’soina dakòrdo azta dise kamöündarn khearn in Trentino. Est iztada mångl a kostitutzionàl Gesetz.
Foto von Prèss Åmt
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
