Ai 3 de otober, via per l domesdì, te la “Sala Trentino” del palaz senta de la Provinzia, l é stat tegnù
la 37^ Conferenza de la Mendranzes, reta dal assessor provinzièl a l’istruzion, università e cultura e co la prejenza de la dirigenta del Servije Mendranzes linguistiches locales e audit europeo PAT. En coleament da remoto, i raprejentanc de la comunanzes de mendranza ladina, mòchena e cimbra.
Al orden del dì, la situazion atuèla de la informazion per televijion e per radio de mendranza, ence do dal switch–off del canal TML del firé 2022, olache vegnia portà dant trasmiscions dedichèdes a la mendranzes linguistiches storiches locales.
Te curt temp se podarà veder tel Trentin i canai ORF 1 e ORF Sport: l prum, a vocazion generalista, l arsegurea la trasmiscion de “Südtirol heute”, e donca informazions e contegnui de enteres per lengaz todesch, al ben de la mendranzes todesces. L second, desche canal dedicà a la competizions sportives più emportantes, ence a livel mondièl, l raprejenta n didament per slarièr fora l fèr sport e en particolèr la doura del lengaz todesch te anter la popolazion trentina.
La normes de defendura de la mendranzes linguistiches storiches, les perveit defat che, te la zones de partegnuda, vegne garantì l derit de aer informazions sibie scrites che audiovisives tel lengaz so de ogne comunanza, e de arsegurèr tras trasmiscions radiotelevisives la promozion de la carateristiches culturèles de la popolazions ladina, mòchena e cimbra. A chest propojit l é stat tout su l parer de obligh, nia vincolant, de la Conferenza de la Mendranzes per meter en esser n contrat con EI Towers, la soula a aer la frequenzes per l teritorie del Trentin Südtirol. Te chest contrat l vegn pervedù la ritrasmiscion del segnal de la emitenta austriaca ORF te la arees de referiment de la mendranzes de lengaz todesch e sul rest del teritorie provinzièl.