Mercoledì, 23 Ottobre 2024 - 13:27 Comunicato 2923

Traduzione in mòcheno
Bersntol ont Palai, s gea’ envir de gèltunterstitzn van Projekt Derver

Der punkt van òrbetn pet en Fugatti ont de pirgermoastern: va de Provinz kemmen 2 milionen va mear. S sai’ u’pfònk de òrbetn ver de nai bòsserlaitung en Palai

[Mòcheno] S gea’ envir de gèltunterstitzn u’gahenk en Projekt Derver van PNRR as sicht der Trentin en spil pet Palai ont s Bersntol. En eirta af de 22 van schanmikeal sai’ gem kemmen de òrbetn en bèrk as sa gabungen hòt ver en pau va de nai bòsserlaitung van hittn en de Gamoa’ va Palai, as ist oa’na van òrbetn vourtsechen ver za gem bèrt en de lontschòft, ver za vernaiern de haiser ont de derver van lònt, ver za verpessern s nètz van ben, ver za gem kròft en turismus ont en nochhòltegverpesser. En doi trèff, pet en president va de Autonome Provinz va Trea’t ont van viar pirgermoastern, Franco Moar (Palai en Bersntol), Andrea Fontanari (Schandurschl), Lorenzo Moltrer (Vlarotz) ont Luca Puecher (Garait), s ist der punkt gatu’ kemmen af de projektn as za tea’ hom pet de infrastrukturn ont s verkear. “S ist an guatn moment gaben - asou hòt der Fugatti tsòk - ver za schaung aus abia as gea’ de dinger ont ver za sechen zòmm de beiln as sai’ de bichtestn sòchen ver za verpessern a lònt as runt bichte ist ver de inser Autonomi, ver sai’na ausònderkaitn en de kultur, en de sproch ont en de umbèlt. Ber hom u’pfònk za trèffen de amministratorn ver za klòffen va bichtestn dinger ver de beiln za gem òndra 2 milionen, gem va de Provinz ont schoa’ drinngaleik en u’glaichenbilanz u’ganommen en heibeger. Gèlt as derzua galeik kimmp en de 9 milionen schoa’ gem ver za verpessern de haiser ont de derver, ver de umbèltòrbetn, ver en verpessern van verkear ont s grea’verkear. Van doin 9 milionen, 6,5 sai’ versichert van PNRR, ont de òndern 2,5 ver de ben van provinzalbilanz”.
La riqualificazione del borgo di Palù del Fersina è uno dei progetti del PNRR per il Trentino [ Provincia autonoma di Trento]

En de bochen as kemmen, zòmm pet de pirgermoastern men bart song de beiln as sai’ de òrbetn za leing en vernaier van Dokument va Programmazion (DOPI) van Infrastrukturn ont Verkear Toal va de Provinz, turch an zòmmklòffen iber en verpessern van strosn af de Provinzalstros 135 (Tschenket Bersntol) ont af de Provinzalstros 8 (Rècht Bersntol).

De òrbetn en oa’zelnhaitn
Asou abia schoa’ tsòk, s Provinzalbèrk ver de òllgamoa’òrbetn hòt ungefer 9 milionen euro praucht, ont ver de mearestn òrbetn ist sperrt kemmen s stuck van Projekt va de technike-zuazol moglechkait ont iaz geat men baiter pet en esekutivprojekt asou za mòchen de gara ont za gem de òrbetn.

Van òlla de òrbetn enviretrong va Apop, 2.364.918,32 euro sai’ praucht kemmen ver za gem bider bèrt en de haiserpahalter ont en de derver: en gònzn sai’ envirtrong kemmen sechs òrbetn va biderbèrt gem en de derver ont en de ben as sa u’hengen, va aupau va platz ver de aute ver de lait as do lem, va prauch van gamoa’haiser en Palai ver zòmmlemòrbetn ont platz ver en smart working, va ausrichtn an òlts haus ver naia òrbetn van Bersntoler Kulturinstitut.

Ver en verkear barn praucht kemmen 6.207.112,40 euro ver òcht òrbetn, ver za verpessern ont leing en sicherhait, turch naia gea’ben aa, de provinzalstros 135 tschenket Bersntol van Gamoa’n va Garait ont va Vlarotz ont de provinzalstros 8 en Schandurschl (pet en vuasbe zbischn Mala ont de Stefani ont s en plòtz leing der plòtz ont der vuasbe as schoa’ ist); ver en grea’verkear tschbinnt mer vour za paun en Palai ròstnplatz ver af de Provinzalstros 135 pet plinder ver de elektreseladung.

S sai’ nou dòra de òrbetn va de umbèlt, petn nai stuck va bòsserlaitung ver de heff en de Gamoa’ va Palai en Bersntol (do unter òlls sèll as ist za bissn), de òrbetn barn kostn 280.000 euro ont en gònzn bart kostn 355.000,00 euro. Do unter ist òlls zoacht.

OA-1037/030 – U.F. 30 – Nai stuck va bòssertroger ver de heff en de Gamoa’ va Palai en Bersntol
PNRR - Mission 1 Komponent 3 Investiment 2.1 (M1C3-2.1) ver de schea’nekait van derf” - òrbetbe A, “u’vongprojektn ver en vernaiern de kultur, s zòmmlem ont de birtschòft van Derf as riskiarn za kemmen verlòk oder as verlòk sai’.”

De òrbetn sai’ ver za mòchen a nais stuck van bòsserlaitung ver de heff en de Gamoa’ va Palai en Bersntol. S ist kemmen vourtschbunnen za leing a nètz pet òffeta pflècht, mòchen an tschir ver za innhòltn ont an òrbet ver za auklaum as praucht ver za gem aus mear bòsser.

As de 15 van schanmikeal 2024 ist kemmen untertschrim der kontrakt zbischn de Autonome Provinz va Trea’t ont de bèrk as hòt kriak de òrbet (Betta SRL).

Der kost asn kontrakt van òrbetn: 280.000 euro pet drinn de kòst ver de sicherkait, schoa’ ganidert van 7.6%
Zait van kontrakt: 360 ta noch ont noch
Men moa’t za riven de òrbetn en de zbaite hòlb zait van 2025

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol

(cdt)


Immagini