Traduzione in ladino
BRT, n projet con n lonch termin per responer a la mobilità sostegnibola che jirà inant ence do l 2026
L deschiariment de la Provinzia sul projet e su la pèrt che la vegnarà realisèda per i Jeghes. Canche dut sarà en doura se arà benefizies struturèi per utenc e per la comunanza, benfat l alineament con Trentino Trasporti sul smaorament de la perferida
[Ladino] L Bus Rapid Transit l é n projet pissà per dèr na responeta struturèla per la mobilità sostegnibola te Fiem e te Fascia, mioran tel medemo temp l coleament di teritories co la Val del Adesc e con Trent.
Belapontin per coche l é stat endrezà, l é scialdi stat pissà desche n intervent a lonch termin, adertura ence do dal 2026, e donca con ejic ence do dal gran event sportif olache sarà protagonist l Trentin ensema con de etres teritories. Donca nesciugn se pissèa de aer dut vertech per i Jeghes olimpics e paralimpics da d’invern. Aldò de chesta vijion ge vel interpretèr duc i besegnes coleé al jir en doura del nef sistem, en cont per ejempie di veicoi de trasport, donca di neves mesi ecologics, opuramenter del completament de la pèrt de la infrastrutures. Chest l é l deschiariment dat da la Provinzia autonoma de Trent per defenir miec l argoment che revèrda l projet del Bus Rapid Transit, che va inant en colaborazion anter l’Agenzia provinzièla per la operes publiches (per la pèrt de la infrastrutures) e Trentino Trasporto, sozietà a chela che ge pervegn la pèrt che revèrda l servije de trasport publich e i servijes coleé.
L era ence più che segur – va inant coscita l deschiariment – che l projet da poder realisèr en previjion de la Olimpiades e Paralimpiades fosse chel che tol ite i raions de Fiem e de Fascia, che l é chi più enteressé dai Jeghes. Belimpont sun chesta arees vegn metù a jir la ativitèdes gestides da l’Agenzia provinzièla operes publiches, che la é do a fenir la projetazion e a envièr via la fasa de garejèda e realisazion de doi toc de infrastrutura aló dai trampolins de saut coi schi de Pardac. Se trata bele demò de na terza corsia resservèda a la corieres, pissèda per aer n servije de trasport publich spedient, zenza ge dèr d’empaz ai etres mesi te n toch de strèda olache l é n gran passaje de auti.
Aldò de chest, se pel esser a una con chel che prezisea la sozietà Trentino Trasporti donca che la pèrt infrastruturèla e chela de la perferida de mobilità coletiva vae inant ensema. Per fèr acioche l percors de renforzament del servije l vae inant coi medemi tempes del svilup “fisich” del BRT. N nef sistem che jà da sobito portarà n miorament del sistem de mobilità publica te Fascia e Fiem de gra a la compra dantfora de la neva corieres. E che tel moment che jirà dut en doura ge arsegurarà benefizies amò più gregn a utenc e a duta la jent, canche duc i intervenc pervedui i vegnarà fac, anter chi apontin la rei de viabilità, la fermèdes, la corsies resservèdes, i semaferes, la infomobilità e l’arees de sosta.
Traduzion di Servijes Linguistics e Culturèi del Comun general de Fascia
(cdt)
Immagini
