Z geschèft iz khent inngerichtet in di lokél boda soin khent zuargètt von kamòu. “Bar håm inngerichtet pezzar zoa zo haba mearar platz, pitt naüge dianst, un ploazez naügez geplèttra. Darzuar offetüanante da habar gemak åstèlln a naüga mittarbataren boda lebet atz Lusérn – hatta khött dar Aldo Marzari, vorsitzar vodar  Kooperatìf Famildja – Pittnåndar pinn produkte von ünsarn lentar, di laüt mang  zornìrn zbisnen mearare åndre gemecht Coop boda sicharn a hoacha qualitét un pinn djüst prais. Bar håm genump toal in båndo augelekk von Kamòu vürzovüara ’z geschèft bizzante sa bazzaz paitet – hattar no khött – defàtte, haltn offe a khlumma geschèft aftnan pèrge bartz nèt soin dèstar ombrómm ’z bart khemmen zo khosta mearar baz daz sèll bobar mang gebinnen. Ma bar bizzan zo maga gebinnen di bett azta di laüt von lånt bartnaz stian nåmp un azza höarn ’z geschèft azpe a dianst dar soinen boda iz eppaz guatz vor alle”. ’Z geschèft “bart khemmen z’soina a trèff punkt boda di laüt mangse vennen un asó di kamòuschaft steat panåndar, darzuar – azpe da sa iz khent khött – bartz soin a grunt dianst vor di laüt von lånt un vor di turìstn boda pan summar un pan bintar khemmen afte Hoachebene un atz Lusérn”.  Asó khinta geopfart a guatar dianst pitt hoacha qualitét a hauppunkt vor di laüt boda lem in lånt vor di feroine un vor alle di fraiböllege. “Bar håm detzidart vürzovüara ditza naügez geschèft – hatta no khött dar Marzari – ombrómm bar håm ka hèrtz di sèlln vèrt vo solidarietét boda soin dar khèrn vodar trentinar kooperatziong, åhevante vodar Trentinar Federatziong  un von Konsortzio Sait”.

’Z geschèft iz vo schiar 110 mètre quadre, darzuar soinda a sèchtzek mètre quadre magazì un åndre dianst. “’Z iz khent inngerichtet modèrn – izta khent khött – un pitt mearar platz. Ma hatt gehaltet starch kunt z’zera bintsche enerdjìa pitt naüge solutziongen zo laüchtega”.

“I pinn konvintzart ke ditza geschèft bart gian garècht – hatta khött dar pürgermaistar vo Lusérn, Gianni Nicolussi Zaiga – bar bizzan ke bait von stattn daz sèll boma gebinnt iz gåntz bintsche. Di kooperatziong makz tüan ombrómm ’z izzar genumma gian auz glaich åna gebinn”.

Dena håmda geredet dar Paolo Zanlucchi, pürgarmaistar von Kamòu vodar Hoachebene vo Vigl un Vatàr, dar Adriano Marzari, vitze pürgermaistar vo Folgrait, dar Isacco Corradi, Pürgermaistar vo Lavròu un vorsitzar von Toalkamou vodar Zimbar Hoachebene, dar Davide Palmerini vüarar von schaltarla vo Lusérn un Lavròu vodar Spaarkasse.
’Z soinz geschèft boda soin gåntz bichte ombrómm – hatta khött di Paola Dalsasso, vitzevorsitzaren vodar Trentinar Federatziong vodar Koperatziong – ’z soin plètz boma, ja khoaft bazma nützt, ma in da gelaichege zait plètz bomase vennt asó steatma mearar gepuntet azpe kamòuschaft o”. “Tüan offe atz Lusérn hatt azpe zil gem an naüng dianst in laüt – hatta anvétze khött dar Renato Dalpalù, vorsitzar von Konsortzio Sait – sichar dar dianst hatt soin vèrt z’soinada lai azzar iz geböllt vo alln, azta ditza bart vürkhemmen pinne sichar ke ’z geschèft bart håm a långez lem”.

“Di öffnung vonan naüng kooperatìf geschèft atz Lusérn iz eppaz gåntz bichte, boda zoaget in djüst gaist vodar kooperatziong, boda mocht soin in di lentar nåmp in laüt, übarhaup di sèlln boda lem vort bait von stattn – asó hatta khött dar Roberto Simoni, vorsitzar vodar trentinar kooperatziong – i gratulìarme pittar Kooperatìf Famildja Vatàr un Hoachebene zo haba gehatt in koradjo auzolega ditza geschèft, zo geba disan dianst in laüt vo Lusérn. Boda, vo haüt vort, hatt nèt lai a geschèft boda vorkhoaft geplèttra ma an platz zo vennase”.

In tage boda iz khent offegetånt ’z geschèft iztada o gest dar Alessandro Ceschi, djeneràl Direktór vodar trentinar Federatziong vodar Kooperatziong. Schümma soinda gest di zboa kantzü gesunk vodar Zimbar Koràl durchgevüart vodar Nadia Nicolussi Paolaz un vorsitzt vodar fabiana Nicolussi Paolaz. Di botege iz khent inngebaiget von faff Giorgio Cavagna. Pittar hakh vodar snur hattma gemacht verte di öffnung.

Di Kooperatìf Famildja vo Vatàr un Hoachebene hatt 126 djar stòrdja di iz khent augelekk atz vatàr ’z djar 1896. Di gesellschaft soin 1620. Dar Dirèktor vodar Kooperatìf iz dar Andrea Corn. Di laüt bodada arbatn soin a draitzekh un darzuar soindara åndre vünve, sèkse in stadjong. Di geschèft soin zene, uleve est pinn sèll vo Lusérn, viare soin afte Hoachebene vo Vatar un Vigl (Vatàr, Vigl Vatàr, Bosentìn un Pian dei Pradi) un sèkse in Kamòu vo Folgrait (Folgrait, Costa, Kholegen, Sanbastiå, Nüsslar, un Serada). Da håm mearare dianst di sèlln von Nüsslar, Sanbastiå, Pian dei Pradi un Bosentìn. ’Z geschèft vo Lusérn iz  daz ulefte un daz vünfte pitt mearare dianst.

Foto un pildar von Prèss Åmt vodar Provìntz un von Prèss Åmt vodar Trentinar Federatzion vodar Kooperatziong

Di Pildar makmase abevazzan da: https://we.tl/t-dQNPuQtbrX

Übarsetzt von Schaltarle vor di zung von Toalkamou vodar Zimbar Hoachebene