La Provinzia, da dotrei egn en ca, la met a jir projec ouc al miorament de la perferida formativa, ge dajan gran atenzion a la formazion di dozenc che ensegna lengac de mendranza. Anter chisc à na gran valuta ANTROPOLAD, na scomenzadiva che à ja abù ejic dassen positives e che à arjont sia quarta edizion, che no la vel demò ge responer ai besegnes palesé da la comunanza ladina, ma ence a chel che disc la lege su la scola, che perveit desche condizion per dèr su, con prezedenza assoluta, i posć vec e a la leta per la assunzions a temp no determinà e determinà de personal ensegnant de la Scola Ladina de Fascia, tant chela de aer l atestat de cognoscenza del lengaz e de la cultura ladina, ma ence chela de aer la atestazion de calificazion arjonta do aer tout pèrt a  projec de auta spezialisazion.

ANTROPOLAD  l é out a chi che volessa doventèr ensegnant e ai dozenc en servije te la scoles de ogne livel de l’area ladina de Fascia e l é orì ence ai dozenc e ai operatores culturèi de l’area ladina dolomitica, scin canche sarà posć a la leta.

L cors de formazion, che durarà cater semestres, perveit na atività didatica en dut che vèl desche 18 CFU, con obligh de tor pèrt al’80% de la ores pervedudes per la lezions e per i laboratories. Duc i corsc i vegnarà metui a jir te la senta de la Scola ladina de Fascia, a Sèn Jan / San Giovanni di Fassa.

Per tor pèrt al cors ge vel aer l diplom de matura. Pel se enscinuèr ai ensegnamenc ence chi che à l diplom de matura, chi che à desmostrà de aer na gran cognoscenza de la materia e duc i studenc de l’università enscinué a na vida regolèra a la università de Trent e de Busan. Ge vel aer n livel de competenza de talian e de ladin medemo o più aut che l B2 QCER. Chi che no à i zertificac linguistics podarà fèr n ejam per l zertament de la cognoscenza de livel B2 de ladin aló da la Libera Università de Busan, do se aer enscinuà. 

Traduzion di Servijes Linguistics e Culturèi del Comun General de Fascia