Traduzione in ladino
A Bruxelles la conferenza finèla del projet ECCA-European Charter Classroom Activities
L event l é stat endrezà ti ofizies de raprejentanza de la Provinzia de Trent te la capitala europeèna
Endèna la setemèna olache se à fat festa per la Dì europeèna di lengac, che la é ai 26 de setember, l é stat endrezà la festa per la seconda edizion del projet ECCA - European Charter Classroom Activities, ti Ofizies de raprejentanza euroregionèla de Tirol, Sudtirol e Trentin a Bruxelles. L projet ECCA l é nasciù del 2019 per endrez del Comun General de Fascia e l é jit inant te chesta seconda edizion tel ciamp del Pian de atività del Istitut Cultural Ladin “Majon di Fascegn”.
L projet ECCA, metù a jir en colaborazion e co la direzion dessema de la Proviniza de la Frisia (Paijes Basc) l é cofinanzià da la rei europeèna NPLD (Network to Promote Linguistic Diversity) e l’à l fin de tor ite studenc de la regions linguistiches europeènes per la valorisazion de sie lengaz mère, tras l barat de esperienzes, campus de formazion dintornvia l plurilinguism, projec e ativitèdes didatiches, per engaissèr ti joegn studenc la consaputa che de gra a sie lengaz de mendranza se pel jir sorafora la seides regionèles e doventèr protagonisć de la desvalivanza linguistica che caraterisea l’Europa.
La gaissa di joegn e di ensegnanc che i à raprejentà sie compagnes e sie coleghes te la zerimonia che à serà su l event la é stata n muie da sentiment e, endèna l ultim desche toron, l é vegnù fora pissèdes neves e originèles per l davegnir de ECCA. L projet se à serà su coi raprejentanc de la Comiscion Europeèna che i à aprijià i resultac porté dant e dut chel che l é stat fat per tor ite i joegn studenc e insegnanc te la ativitèdes portèdes dant, engaissan l NPLD a candidèr ECCA desche scomenzadiva da finanzièr tel chèder de ERASMUS+. N zil deldut bon per la mendranza ladina, raprejentèda a Bruxelles da na studenta de la Scola Ladina de Fascia e da la diretora de la Majon di Fascegn, ma soraldut per i ensegnanc e i studenc de la 8 comunitèdes linguistiches che à tout pèrt: ladins, frijons, catalegn, baschi, finlandeisc de Svezia, unghereisc de Romania, furlegn e galeisc.
L projet ECCA l fèsc pèrt de la ativitèdes de la rei europeèna NPLD-Network to Promote Linguistic Diversity, a chel che la mendranzes linguistiches de la Provinzia de Trent les tol pèrt tras la Provinzia medema.
Per informazions: https://thisismylanguage.eu/
Traduzion di Servijes Linguistics e Culturèi del Comun general de Fascia
(cdt)
Immagini
