De austell sicht vour an raichen ring: kajagtrofei as kemmen va mearer eirter, òlta ont naia letrattn ont momentn va trèff zbischn jagerer, familie ont lait as en gearn hom. An moment ver za leing en liacht nèt lai de kajagòrbet, ober de sèll van lait as òrbetn en regiar van lònt ont en pahòlten van glaichbeng van vicher aa.
Der assessor Failoni hòt klòfft va de bichtekait va de òrbet gamòcht va de Provinz zòmm pet de Vraischòft Trentinerjager: “S ausklòffen se mearer vert hòt trong en groasa tritt envir, abia de moglechkait za organisiarn learring ver en viarer as e auskennt, asou za versterchern de kompetenzn ont de qualitet van sistem. Ber gea’ envir za kontarn en an rèchtn vurm de enker òrbet: naikaitn abia de doi hèlven za paun s bissn ont s ausklòffen se va de gamoa’schòft”.
Der president van Act Matteo Rensi hòt unterstrichen abia de austell va regiar va Kamaovrunt lòk sechen de òrbet unterstitzt avn lònt en leiste jor: “Turch de zeiln tea’ ber kontrolliarn biavle billvicher as hòt avn lònt ont ber tschbinnen vour en de Provinz abia za jagern, pet en rif za pahòltn de schòrt vicher. De datn van 2025 sai’ positiv: en Trentin hòt s mear abia 75.000 vicher, zbischn hirschn, kaprioi, gamps ont muflonen”.
Der pirgermoaster va Garait Luca Puecher hòt unterstrichen de òrbet van kajagplatz ver en kontroll van lònt: “S kajag ist nèt an òrbet van a jorzait aloa’, ober van gònze jor. De zòmmòrbet pet de Gamoa’amministrazion ist bichte: van projektn ver za schitzen der spilhu’ finz en de òrbetn va verpessern de lòntschòft ont van pahòlten de staig".
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
