N domarena dedicà al père de la storia de Fascia
Père Frumenzio Ghetta de Martin, om, religious, poet, storich: en domenia ai 21 de oril la recordanza
[Ladino] En domenia ai 21 de oril, da les 4 domarena te la senta del Istitut Cultural Ladin “majon di fascegn” a Sèn Jan, Strada de la Pieif 7, la Majon di Fascegn e l’Union di Ladins de Fascia recordarà Père Frumenzio Ghetta de Martin 10 egn do da sia mort, delaite da la scomenzadives de l’Aisciuda Ladina.
Père Frumenzio l é stat persona ecletica, enrescidor ascort che ge à dat na storia a Fascia da la preistoria en ca, l é stat ence poet de sia tera, sostegnidor de la costion ladina e religious cognosciù che se à fat voler ben no demò te Fascia. No se pel se desmentièr che l storich fascian se à fat onor bendeché ence foradecà; anter l’auter recordon, canche adinfal, te la piates de n liber veior, l à troà l simbol de l’ègua de Sèn Venceslao, doventà blason de la Provinzia autonoma de Trent.
Alberto Antonio Ghetta, chest l era sie inom de batum, l era n om curious, grignolent e feruscol, amant de la mont e de sia tera, poet, de bona man e zis tacà a chi de cèsa, che l à cognù lascèr da bez per jir preve.
L domarena en sie onor l sarà spartì su te desvalives moments, olache tras paroles, video, rimes, musega e orazions Père Frumenzio sarà amò anter sia jent con dut chel che l à lascià desche ritajon. N recort del studious da man de chi che à lurà con el apede a n recort de sia familia che a na vida gustegola e neva portarà dant ence n aspet più privat ma zis douc del fra e bèrba Tonin.
Da les 6 da sera, te la Pief de Sèn Jan, vegnarà ence dit messa per Père Frumenzio.
Istituzions e familia donca, ensema per n salut coral e n moment de identità gustegol e sćiantif te na dì d’aisciuda fora de sajon, te Fascia.
(S.Ra.)
Immagini
