“L é n passaje dassen emportant- sotrissea l president Fugatti-per la realisazion de n lurier de gran valuta per miorèr la viabilità del teritorie te n raion de gran prijie. La publicazion de la garejèda l é la conferma che sion do a se dèr ju acioche n projet de gran valor e tant spetà da la comunanza de Fascia l dovente concret”.
“Son stolz de veder che l é stat fat chest nef vèrech inant per la realisazion de na opera strategica per Fascia e spetèda da passa 30 egn”, à dit l assessor regionèl a la mendranzes linguistiches Luca Guglielmi.
Per la realisazion de l’opera, che la fèsc pèrt di intervenc strategics programé da l’Aministrazion, i documenc de programazion perveit na suma de finanziament de presciapech 142 milions de euro. L percors en dut pervedù per la neva viabilità (UF1) l é de presciapech 3,2 chilometres, de chi che 2,8 te n tunel.
Per meter a jir i lurieres, vegn pervedù che la consegna de duc i documenc del projet de fatibilità tecnica e economica (PFTE) e de la pruma indicazions per meter ju l pian de segureza e coordenament la vegne fata dant da 167 dis dal scomenz de la prestazion. La consegna de duc i documenc del projet esecutif e del pian de segureza e coordenament ge vel che la vegne fata dant da 104 dis do da la comunicazion de scomenz de la prestazion de referiment do aer tout su, tel ambit de la Conferenza di servijes, duc i pareres pervedui sul PFTE.
RUP – l Comissarie straordenèr de l’opera S-1021- Varianta Ciampedel Cianacei – enj. Bruno Lorengo.
Traduzion di Servijes Linguistics e Culturèi del Comun general de Fascia
