Spartì su te diesc puntates, l podcast nasc da na enrescida sul teritorie fata da Marco Romano e Sara Sartori te desvaliva valèdes del Trentin, dai raions più fora de man a chi più turistics. Cher de che che vegn contà l é chinesc joegn anter i 25 e i 40 egn che i spartesc esperienzes personèles e profescionèles che à sia reijes tel teritorie, con na veièda sćiantiva e da anchecondì su la vita sa mont.
Sia stories conta cernudes desferentes ma che va ampò a una: zachei à dezidù de jir a stèr ti raions da mont e zachei de auter, vegnù su te chisc lesc, l à volù restèr, col portèr inant la ativitèdes de familia o col envièr via neva esperienzes profescionèles leèdes al teritorie.
Vegn fora a chesta vida vijions e projec che, co la endesfides da duc i dis, fèsc entener la dificoltèdes e la oportunitèdes del viver sa mont aldidanché. Sia oujes conta de n leam fon col teritorie, de sie amor per i raions da mont, fat de struscies e ocajions, e les met al luster percorsc desferenc ma che à i medemi valores: rencurèr l ambient, respetèr la reijes culturèles, saer inovèr zenza perder l'identità.
Anter i protagonisć: artejegn, bachegn, gestores de uties e cobies joenes che viventea saeres e prateghes da zacan a na vida da anchecondì. Sia stories, binèdes su te la valèdes de Rabbi, Concei e Cembra, fin te Fascia, Fiem e Primier, met adum n chèder de vita da duc i dis caraterisèda dal se dèr ju, dal saer e dal esser bogn de ge fèr front a la dificoltèdes con determinazion. Anter la oujes toutes su, chela de na tislera che porta inant a na vida neva la tradizion del artejanat, de n arlevador che sperimentea produzions sostegniboles, de na gestora de na utia che vif l teritorie da mont desche n lech per se scontrèr, e amò apede de na cobia con n fon leam co la cultura ladina. Vegn fora stories concretes de touses e fenc che, con sie lurier de ogne dì, con anteveder e resilienza, i moscia tant feruscol che l é l viver sa mont, engaissé dal respet per sia reijes, dal coraje e dal esser bogn de ge fèr front a la fadia.
La esperienzes de chisc joegn vèrda al davegnir, a tach con n mond daite rich e consapevol. L projet porta dant n chèder desvalif e rich di raions da mont no desche lesc fora de man e de pecia emportanza, ma desche laboratorie de prateghes da anchecondì, olache competenzes, creatività e cognoscenza del limit vif adum con na spenta forta
envers l davegnir. No mencia la endesfides ma se ge fèsc front con determinazion e capazità de fèr projec.
“Noi restiamo qui – Giovani storie montanare” l é n envit a scutèr e a pissèr: n viac sonor olache se enterza stories, cernudes e prospetives, col ge dèr neva vita e fondament a n mond che muda.
Produzion: METS – Museo etnografico trentino San Michele
Ideazion e enrescida: Marco Romano
Registrazion, tai e finalisazion: Sara Sartori
Traduzion di Servijes Linguistics e Culturèi del Comun general de Fascia
