Gerosa: “Di èkomusee echtege sealn von ünsarn lentar auzohalta un zo sterchra”
Èkomusee: ågenump dar auzschraibung vor prodjèkte vor di djar 2026/2027
Traduzione in cimbro
[Cimbro] Da provintziàl Djunta, vorgelekk vodar Asesören vor di kultùr Francesca Gerosa, hatt ågenump in naüge auzschraibung auzohalta kulturàl prodjèkte von èkomusee darkhennt vodar autonome Provìntz vo Tria vorz djar 2026.
“Ånemmante disan auzschraibung vorz djar 2026 bölbar machan gian vürsnen un stercharn a realtét, da sèll von èkomusee, boda zoaget da echte seal von ünsarn lentar – hatta khött di Gerosa – di èkomusee soin nèt lai hüatar von gedenkh, ma djüste labör boda machan vürgian di lentar boda ’z gebizza trèfft di umbèlt un di vornaügarung. Untarleng afte kultùr billz bölln soin gemuant gloam in an modo zo kreschra boda åheft vo untar, von lem bvo alle tage, guat zo bèksla di tradiztiongen un di identitét von lentar in konkrètege oportunitét zo geba naügez lem vor di djar boda khemmen. Ünsar zil iz auhaltn un stercharn disa nètz, zoa azta dar kulturàl schatz saibe hèrta eppaz guatz vor alle un an motor boda schupft zuar a sotziàl pintom in anigalz tal von Trentino”.
Disa initziatìf steat drinn in sèll boda auzmacht daz provintziàl gesetz n. 15 von 3 von bimmat 2007 boda darkhennt di èkomusee azpe grüntliche struméntn zo macha vürgian ünsarne lentar. Dise realtét, augehaltet un vürgevüart von lånt Emtar håm an bichtegen ruòl zo darhalta un zo geba vèrt dar stòrdja, dar kultùr un dar pintom bodada iz zbisnen dar umbèlt no in gåntz un di lentar gelebet, legante panåndar di kulturàln politike pinn sèllnen boda ågian dar umbèlt, dar ekonomì un dar nåsüach.
Dar auzschraibung hatt drau in gåntzan 240.000,00 euro. Ditza gèlt, boda sa iz gest hintargehaltet pittnarn pellarn delibera von lentz von 2026, bart soin inngetoalt in zboa djar zo maga machan verte di prodjèkte inngètt:
- 144.000,00 euro vorz djar 2026.
- 96.000,00 vorz djar 2027.
Darzuar in kritèrie von auzschraibung dar provedimént hatt ågenump di formulér bodada soin mångl innzogeba di vorsch, in akonto un dena z’soina auzgezalt verte. Alle di briavan, dar auzschraibung un di formulér bartn mang khemmen abegenump tra bintsche zait afte istitutzionàl websait vodar autonome Provìntz vo Tria.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
