Gerosa: “De ecomuseum èchta sealn van inger ourt za unterstitzn ont versterchern ”
Ecomuseum: u’ganommen der bando ver de projektn van 2026/2027
Traduzione in mòcheno
[Mòcheno] De Provinzaljunta, as a vourtschbinn van Assessor va de kultur Francesca Gerosa, hòt u’ganommen der nai’ bando za unterstitzn de naiòrbetn van projektn van ecomuseum derkennt va de Autonome Provinz va Trea’t ver en jor 2026.
“Pet en u’nemmen van doi bando ver en 2026, bill ber mòchen enviregea’ ont versterchern a boreket, de sèll van ecomuseum, as derstellt oa’na van sealn mear ècht van ingern eirter - hòt kein de Gerosa - De ecomuseum tea’ nèt lai derretn s denken, ober de òrbetn ver en lokalverpesser bou s kennen vinnt se pet de umbèlt ont de naiekaitn. Zuazoln de kultur billt song glam en an model za bòcksn as embiart van dru’, guat za mòchen kemmen de praich ont de lokalidentitet en moglechkaitn ver sèll as barn sai’ de ingern gamoa’schòftn. De inger rif ist za unterstizn ont versterchern de doi netz, asou as der kulturpahalter geat envire za sai’ a ding ver òlla ont an motor za hòltn zòmm de lait en òll tol van Trentin.”
De naiòrbet ist drinn en Provinzalgasetz n. 15 van 3 van otobre 2007, as derkennt de ecomuseum abia bichtega plinder ver en lokalverpesserung. De doin boreketn, enviretrong van lokalninnrichtn, sai’ runt bichte za denken ont giltn de gschicht, de kultur ont de nètz pet naturalumbèlt ont de sèll gami’t van lait, ver dòs hòt men enviretrong kulturpolitik zòmm pet umbèlt, birtschòft ont pasuach politik.
Za trong envire der bando ist kemmen semm galeik an budget va 240.000,00 euro en gònzn. S gèlt schoa’ semm galeik pet a voudera ausrot va merz 2026, barn sai’ toalt as zboa jarder za versichern s enviregea’ van projektn:
- 144.000,00 euro asn bilanz van 2026;
- 96.000,00 euro asn bilanz 2027.
Pet de mossnemm sai’ kemmen u’ganommen de kritern van bando ont de modeln za vourstelln de vrong, za kriang s hòlb ont s ònder hòlb gèlt. Òlla de dokumentn gor der gònze bando ont de modeln, en a kurza zait barn sai’ asn innrichtsito va de Autonome Provinz va Trea’t asou as òlla meing sa sechen.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
