Di aministratör von lentar soinse alle khött kontént vor an arbat boda iz khent gepitet vor långa zait, dar pürgermaistar vo Lavròu hatt khött ke ’z izta khent gevuntet da peste solutziong bodada magat soin, boda zuargitt zo maga haltn in gåntz in groaz stòrege un turistge vèrt von bege un in da gelaichege zait zo pezzra di pintom pittar valsugåna. Di gelaichegen börta boda hatt khött dar pürgermaistar vo Lusérn o, boda hatt darzuar khött ke ditza bart sichar helvan vürzovüara soi lånt, dar asesór Giavcomelli vo Kalnètsch izzese o khött kontént von prodjèkt boda bart zuargem zo maga gian vür zo leba afte pèrng. “An arbat boda helft zo halta di famildje zo leba afte hoachebene un boda bart mang zuar machan khemmen åndre o” ditza hatta khött dar pürgermaistar vo Folgrait boda hatt o untargestricht in vèrt boda dise arbatn håm zo pintase pinn Veneto o. Ke dar bege bart soin bichte vor pèrng un di khesarn un vor in turismo iz khent khött von pürgarmaistar vo Leve, boda hatt gevorst zo maga offetüan in bege vor a zait auz pan summar boda khint. “A strategesche arbat boda bart soin grüntlich zo magase mövarn un vor allz daz sèll boda iz mångl vor dise lentar” asó hatta gemacht verte zo khöda dar vorsitzar Fontanari, dar vorsitzar Paccher, anvétze, hatt untarstricht ke dise soin lai a toal vo alln in arbatn boda di Provìntz in drumauz zo traga vür in Valsugåna.
Zo zoaga bazta bart khemmen gemacht in konkrèt iztada gest dar diridjént von Dianst vor di beng un di aisanpån Carlo Benigni uantze responsabile von protzedimént vor di zboa toaln, un dar inzenìar Alessandro Pinamonti vo Apop, dirèktor von arbatn von earst toal.
Di arbatn khött S-136 “Rettifiche e allargamenti sulla SP 133 del Menador - Lotto 1 e 2” trang vürsnen bazta sa iz gest khent getånt vodar Aminstratziong aftn bege vo Monterùf, vo disan di lenst soinse gemacht verte ’z djar 2023, balda iz khent gebetart dar bege zbisnen in kilòmetre 6+600 e 8+600 (opera S-891).
Earste toal
’Z izta khent auzgemacht pinn emtar von lentar zo macha (zbisnen in kilòmetre 7+100 un 7+450) an tunnel pittnar uantzegen korsia zo giana lai in nidarbart, lång 255 mètre. Drinn barta khemmen gemacht an uantzega korsià bait 3 mètre pitt zboa ore afte saitn. In emerdjéntz bartz mang soin möglich azta di hilfan gian saiz nidarbart, saiz aubart. Di zboa stöll bodada sa soin bartn khemmen gehaltet un bartn soin lai in aubart, asó bartma mang viazarn pezzar un bahémmegar, übarhaup balda iz vil trafiko.
Hèrta in earst toal khinta vürgelekk zo richta khurtze tòkkn boda soin nidargånt un zo betra drai perikolosate khearn. In bichtegarste tòkko, zbisnen in km 6+600 un 8+600, bartnda khemmen gemacht arbatn zo betra in bege sin afte 6 mètre pitt zboa korsìan bait 2,75 mètre un pitt zboa ore afte saitn, abenemmante in pèrge afta obar sait un aumachante maurn boda auhaltn in bege aft untar nidarlegante saüln pitt botümm. In tòkko zbisnen in zboa stöll bodada soin, zo halta in stòrege vèrt bosa håm dar bege bart stian azpe dar iz est, pittnar uantzegen korsìa in aubart bait 2,5 mètre un an oro auz nå vo 1,15 mètre, pittanan åndarn oro zuar in pèrge boda bart gian nå in kròtz eppaz betar un eppaz engar.
Ma bart eppaz pezzar di stöll bodada soin o nemmante abe in kròtz boda auzspitzart. Zuar in pèrge, sèmm boda khemmen gemacht di arbatn, dar khròtz bart khemmen gesichart legante aisrane nètzan un spèrnn auzohalta di khnottn. Di arbatn bartn khemmen gemacht verte nidarlegante auz nå kordonate pitt botümm zuar in pèrge, un guardrail zuar in tal.
Dar prodjèkt iz khent gemacht von inzenìar Paolo Nicolussi Paolaz von Dianst vor di beng un di aisanpån. Di arbatn soin khent zuargètt in an khnopf firmen boda innvånk di Casarotto Spa vo Castel Ivano (boda vüart in khnopf) un Ipogeo Srl vo Seren del Grappa, boda håm inngètt zo macha di arbat mindrante vo 6,008%, asó in gåntzan, drinn pitt bazta ågeat di sicharom o, bartz khostn 8.081.983,16 euro. Zo macha verte di arbatn bartnda soin mångl 560 tang nå un nå.
Zboate toal
Zo macha verte zo pezzra in Laaz barta khemmen gemacht a umkhear auzant bait 34 mètre boda bart machan mearar sichar di kreutzung zbisnen in provintziàl bege n. 133 un in statàl bege n. 349 boda vüart zuar Lavròu-Folgrait.
Dar prodjèkt iz khent gemacht von djòmetre Walter Nicolussi Zatta un Marco Valentini von Dianst vor di beng un di aisanpån. Di arbatn soin khent zuargètt dar firma Zortea srl vo Castelnuovo boda hatt ingètt mindrante von 7,426%, in gåntzan 858.565,10 euro, vo disan 25.400 vor di siacharom. Zo macha verte di arbatn bartnda soin mångl 168 tang.
Baz ’z bart khostn in gåntzan
In gåntzan di zboa toaln bartn khemmen zo khosta (drinn pitt augeln, unvorgesegate sachandarn, esproprie, anschluzz un asó vort) 12.750.000 euro.
Spèrrn
In earst månat, sin atz 19 von prachant aftn provintziàl bege n. 133 bartma mang gian nidar odar au auzbèkslantese, anvétze dar provintziàl bege 133 dir (zuar leve) bart soin gåntz gespèrrt.
Von 19 von prachant vort, dar gåntz provintziàl bege n. 133 bart stian gespèrrt sin balda bartn soin verte di arbatn ma gloabet sin in bintmånat 2027, auz baz vor bintsche zait auz pan bintar.
Zo macha verte pellar un zo maga arbatn aftz mearare tòkkn in da gelaichege zait bartma arbatn padar nacht o.
Foto un film von prèss Åmt
Download da
Übarsetzt von Schaltarle vor di zung von Toalkamou vodar Zimbar Hoachebene
