L Ofize Igiene urbèna e ambientèla del Comun General de Fascia con sie Conseier de Procura Manuel Mazzel e l responsabol Stojan Deville porta dant n bilanz en cont de la regoeta desferenzièda di ultimes tempes; te Fascia l é n piorament con ejic grieves. Apede vegn portà dant la neva normativa con multes pesoches.

La jona atleta de saut coi schi Martina Ambrosi, che à tout pèrt ai jeghes olimpics de Milan Cortina 2026, se porta dant. Per ela la Olimpiades de cèsa l é stat n gran zil argont con gaissa e sacrifizies.

Te la sescion forestala stata a Sèn Jan, l Ofize distretual de la Forestala de Ciavaleis, che l tol ite Fascia e Fiem, l à portà dant informazions e dac en cont de la condizions di bosć e de la besties salvères te nosc raion.

A Trent, te Palaz de la Region, tel chèder del prum Dì regionèl de la Mendranzes linguistiches l é stat endrezà na mostra dedichèda ai artisć ladins, mochegn e zimbres. L é stat metù fora desvaliva operes, soraldut scultures e chèdres e apede ence vèlch model del guant da zacan.  

I reports de chesta setemèna i é stac enjigné e porté dant da Angela Pederiva e Riccardo Zanoner.

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). 

L program l va fora ence sun AltoAdige TV – canal 11 Prov. de BZ - vigni domenia da les 18.00 (sie da sera).

Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.

Se pel veder i report un a un su la piata Facebook de TV Ladina:
https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia