Lunedì, 27 Settembre 2021 - 20:21 Comunicato 2664

Traduzione in ladino
Azess ai servijes publics online: dai 30 de setember va en penscion la “security card”

Da otober inant se podarà durèr demò la identità digitèla (Spid), l document de recognosciment eletronich (Cie) o la tessera sanitèra ativèda (Cs/Cps)

Ai 30 de setember del 2021 sarà l’ùltim dì che se podarà durèr la “security card”, un di prumes sistemes de azess ai servijes publics online. La “security card” la era stata metuda en esser per poder vardèr fora i servijes più sorì, ence fora de cèsa, zenza l besegn de aer l letor de smart card o n computer configurà. Da n trat en ca l’azess ai servijes digitèi de la Aministrazion publica trentina l vegn fat tras sistemes più modergn e segures, desche l’Identità digitèla (Spid), la chèrta de recognosciment eletronica (Cie) o la tessera sanitèra ativèda ai servijes (Cns/Cps). Dal scomenz del 2021 i azesc ai servijes publics online co la security card i é stac 343 mile, da man de zirca 24 mile trentins, su n total de 2 milions de azesc. Tel medemo trat de temp, l sistem Spid l’à registrà 1,12 milions de azesc, e la tessera sanitèra la é stata durèda 378 mile oute. Donca, l consei ai 24 mile utenc trentins, che doura amò la “security card”, l’é chel de passèr a Spid, nef standard nazionèl.

A la fin de firé del 2021, la aministrazions taliènes les à metù a la leta sie servijes digitèi online, demò con strumenc de “recognosciment digitèl fort”, desche Spid, chèrta de recognosciment eletronica (Cie) e tessera sanitèra ativèda (Cns/Cps).

Tel Trentin, l mudament envers i neves sistemes de zertificazion l’à tout ite i Comuns, de gra a l’azion de la Provinzia autonoma de Trent, Consorzie di Comuns del Trentin e Trentin Digitèl.

A la fin de setember va fora, descheche dit più outes te chisc meisc, la Security Card, sistem per la doura de la credenzièles alternatives de azess ai servijes publics online. A scomenzèr da chesta dì, i utenc trentins i cognarà aer n recognosciment digitèl fort, desche apontin Spid, opuramenter, la Cps/Tessera Sanitèra.

Spid: coche se l doura e co l domanèr

Spid (Sistem publich de identità digitèla) l’é la soluzion portèda dant dal Goern talian per dèr l met de se emprevaler di servijes online de duta la aministrazion publica talièna, co na soula e segura identità digitèla, da poder durèr tras computer, tablet e smartphone.

Per aer la credenzièles Spid ge vel se oujer a n gestor de identità digitèla, e cerner anter chi abilité da “l’Agenzia per l’Italia digitale” (Agid). Tel Trentin, de gra a na convenzion sotscrita col gestor publich de identità digitèla “Lepida”, se pel domanèr Spid ence alò dai portìe provinzièi e te dotrei Comuns, col ditament di operatores.

Dant de domanèr, online o al portèl, la enscinuazion a Spid, l sentadin cogn aer a la leta cater cosses fondamentèles:

  • l document valévol de recognosciment talian (chèrta de recognosciment, passaport, lizenza de vidèr);
  • la tessera sanitèra o l tesserin del codesc fiscal;
  • la e-mail personèla;
  • numer de fonin personèl;

Se pel se enscinuèr a Spid tras la piata del sit de la Provinzia autonoma de Trent, olache vegn despiegà delvers i passajes de la sotscrizion e olache se pel troèr la lingia di portìe Spid-Lepida a la leta tel Trentin: https://www.provincia.tn.it/Servizi/Richiedere-SPID.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)


Immagini