Venerdì, 10 Luglio 2020

Zungmindarhaitn: vornaügart dar Tisch vor di komunikatziong

Pinn provedimént ågenump haüt vodar Provintziàl Djunta, vürgelekk von Vorsitzar Fugatti, izta khent vornaügart dar Tisch vor di komunikatziong von zungmindarhaitn nå in sèll boda iz khent boroatet un vürgetrakk vodar Diridjént UMSE zungmindarhaitn un européan audit.

In Trentino di stòrische zungmindarhaitn, - ke bar gedenkhanaz soin di mòknar, di ladinar un di zimbarn - håm rècht zo nütza soi zung saiz geredet saiz geschribet hèrta un bobràll.

Dar Tisch vor di komunikatzion vor di zungmindarhaitn iz zentràl vor di informatziong von pürgar boda ren dise zungen, dar Tisch macht auz in plån un baz zo tüana vor di komunikatziong un sichart in da gåntz Provìntz azta khemm gezoaget garècht allz bazta ågeat in prodjèkte un in téme, zo zornira alle di vert boda iz mengl, von mindarhaitn vürtragante di naüng teknologì o.

“Bia bichte ’z izta di informatziong in di zungmindarhaitn hattmaz gemak seng untar in lockdown” - hatta khött dar Vorsitzar Fugatti - balda iz gest mengl zo khöda in laüt baz zo tüana zoa nèt zo darkhrånkha vo covid19. In disa zait habar gemak seng bia di istitutzionàl komunikatziong vodar Provìntz nidargescrhibet von Presse Åmt vor in gåntz Trentino håm gemak khemmen übarsetzt von schartarla vor di zungen. I hoffe azta ditza mage vürgian asó zo sichra in zungmindarhaitn zo maga bizzan di sachandarn in soi muatarzung.

In di djar dar Tisch iz khent z’soina hèrta mearar bichte vor di politike vor di komunikatziong von zungmindarhaitn. In dise lestn månat soinda gebèkslt ettlane sachandarn in di provintziàl organizatziong un asó izta khent mengl zo vornaügra in Tisch zoa azzar mage arbatn pezzar. In Tisch nemmnda toal dise laüt:

- Giuliana Cristoforetti, Diridjént UMSE zungmindarhaitn un européan audit von dipartimént istitutzionàl arbatn un relatziongen, boda vürtrakk in Tisch;

- Sabrina Rasom, vürtragar von zung un kulturàl dianst von Comun General de Fascia azpe vortretar von ladinar;

- Mauro Buffa, dirèktor von Mòcheno/Bersntoler Kulturinstitut, azpe tèknische vortretar von mòknar;

- Anna Maria Trenti Kaufman, dirèktoren von Istituto Cimbro/Kulturinstitut Lusérn, azpe tèknische vortretar von zimbarn;

- Giovanna Chiocchetti, sostitùt von dirèktor von åmt vor di zungmindarhaitn vodar Autonome Redjong Trentino-Alto Adige/Südtirol, azpe tèknische vortretar von Ent;

- Giampaolo Pedrotti, vürtragar von Presse Åmt vodar Autonome Provintz vo Tria.

Affon Tisch, darzuar, mangda khemmen gerüaft vortretar von gesèllschaft odar von öffentleschen entn bodasen drinndarkhennen in di sachandarn boda ågian dar komunikatziong un boda mang khön daz soi. Disar provediment khint nicht zo sbera afte provintziàl roaotm.

(us)


Immagini