Venerdì, 10 Luglio 2020

Sprochminderhaitn: vernaiert de toalnemmer van nochrichttisch

Pet mosnemm hait u’ganommen, de Provinzaljunta, no de vourtschbinn van President Maurizio Fugatti, hòt vernaiert de toalnemmer van nochrichttisch ver de sprochminderhaitn ont hòt u’tsòk de lait as toalmòchen en, derno as de Viarer van Omt va oa’voche mission lokal sprochminderhaitn ont europeisce audit hòt de vourtschbinn u’trong.

En Trentin de lait as toalmòchen van storische sprochminderhaitn – as ber denken as sai’ de ladiner, de bersntoler ont de zimber – hom s rècht za meing klòffen ont schraim de aigene sproch en òlla de social, birtschòftleche ont amministrativ momentn van lem.

Der nochrichttisch van sprochminderhaitn ist runt bichte bavai der miast gem de nochrichtn en de lait as toalmòchen van sprochminderhaitn. Der miast derklorn sèll as der moa’t za trong envire ver en sèll as keart en de nochrichtn, asou as kimmp versichert en de provinzal lòntschòft der richtege bèrt en de projektn ont en de òrbetn as kemmen vòrt ver vòrt tschernt durch de naiketn va de tecknologi.

“S bichte van nochrichtn as ladin, bersntolerisch ont zimber men hòt sa gameicht sechen bail der lockdown – hòt er tsòk der president Fugatti – benn as men hòt gamiast derklorn en de lait sèll as de hom gamiast tea’ ver za mòchen nèt zavil envire gea’ der Covid19. Bail de groas zunthaitnoat, hom ber gameicht sechen de istituzionaln nochrichtn tschrim van Druckomt va de Provinz, ibersetzt gahasse van sprochtirler van sprochminderhaitn as asn lònt sai’ en de aigene sprochminderhait. I hoff as der doi vurm za òrbetn bart meing òlbe mear praucht kemmen, asou as de sprochminderhaitn meing kemmen za bissn de sòchen as de aigene sproch”.

En de jarder, de òrbet van nochrichttisch hòt gòp an bèrt en de òrbetn va de politik ver de sprochminderhaitn en sektor va de komunikazion. En de lestn zaitn no de bècksln va de provinzal organizzazion, ont bècksln van u’stelltn, men hòt de noat gòp za drauschaun ont bècksln de toalnemmer van Tisch ver za gem de meglechket za gea’ envire ver za meing guat òrbetn. Der Tisch ist iaz asou toalgamòcht:

- Giuliana Cristoforetti, viarer van Omt va oa’vòche mission lokal sprochminderhaitn ont europeisce audit van dipartiment ver de òllgamoa’ ont mitòrbetn innrichtn, pet de funzion va regiar van doi Tisch;

- Sabrina Rasom, drauschauer van dinstn va de sproch ont va de kultur van Comun General de Fascia abia toalnemmer ver de ladinersprochminderhait;

- Mauro Buffa, viarer van Bersntoler Kulturinstitut abia toalnemmer ver de bersntolersprochminderhait;

- Anna Maria Trenti Kaufman, viarer van Kulturinsitut va Lusèrn, abia toalnemmer ver de zimbersprochminderhait;

- Giovanna Chiocchetti, en plòtz van viarer van omt va de Autonome RegionTrentin Sudtirol ver de sprochminderhaitn, abia teckniker toalnemmer ver de Region;

- Giampaolo Pedrotti, vourstea’ner van Drukomt va de Provinz va Trea’t.

En Tisch mein kemmen gariaft za toalnemmen abia inngaloneta, de vourstea’ner va dinstn oder òllgamoa’ omtn as sai’ aukenneta ver de sektorn as klòffen va komunikazion, as mein gem a hònt ver sèll as keart en. Ver de dòi òrbet kimmp nèt praucht gèlt as miast bècksln der bilanz va de provinz.

(us)


Immagini