Venerdì, 10 Luglio 2020

Mendranzes linguistiches: l’é stat agiornà l desch per la comunicazion

Con provediment aproà anché da la Jonta provinzièla su na proponeta del president Maurizio Fugatti l’é stat agiornà l Desche per la comunicazion de la mendranzes linguistiches, col troèr fora i membres che i fèsc pèrt, aldò de la nota enjignèda da la Sorastant de la UMSE mendranzes linguistiches locales e audit european.

Tel raion trentin, i sentadins che fèsc pèrt de la mendranza linguistica storica – che l’é i ladins, mochegn e cimbres – i à derit de durèr sie lengaz tant a ousc che per scrit te duc i raporc e la ocajions de vita sozièla, economica e amministrativa.

L Desch per la comunicazion de la mendranzes l’é n strument emportant per l’informazion ai sentadins de lengaz de mendranza, vedù che l’à l’encèria de definir i pians e la azions de intervent tel setor de la comunicazion, de ùtol per arsegurèr delaìte del teritorie provinzièl na visibilità adatèda e na informazion en cont di projec, scomenzadives e argomenc, da troèr fora outa per outa, didan ence l’inovazion tecnologica.

“L’emportanza de l’informazion per ladin, mochen e cimber la se à palesà endèna l lockdown – l’à dit l president Fugatti – canche l’era de besegn ge portèr dant a la jent i comportamenc che ge volea tor sù per smendrèr l sparpagnament del Covid19. En ocajion de chesta ùltima emergenza sanitèra aon abù, apontin, l’ocajion de sperimentèr, en cont de la comunicazions istituzionèles de man de la Provinzia mandes fora da l’Ofize Stampa e destinèdes a dut l raion provinzièl, na modalità n muie percacenta e de fazion, che l’à dat l met de ge manèr a na vida sepdienta ai portìe linguistics loghé fora per i raions de mendranza, la comunicazions da traslatèr per lengaz de mendranza. Spere che chesta modalità dovente n modus operandi che seghite a jir inant ence fora da situazions de emergenza, a na vida da ge arsegurèr a la jent de mendranza linguistica duta la informazions tras sie lengaz”.

(us)


Immagini