Pet en president Mattarella ver en jorzait va de Republik ont va de ausònder Autonomi

Der to va de Autonomi: as de 5 van leistagest der istituzional vaiertrèff ver de 80 jor

[Mòcheno] S bart kearn en tema “1946-2026: de 80 jor van a Republik ont van an ausònder Autonomi” der istituzional vaiertrèff ver en To va de Autonomi, as bart se hòltn en somsta as de 5 van leistagest, um 17.30 kan Sozial Teater va Trea’t. Der trèff gip de moglechkait za vaiern, zòmm pet en Stòttpresident Sergio Mattarella, de 80 jor va de balsch Republik ont van Zòmmpint De Gasperi-Gruber, as sai’ de burtzn van ausònder verregl van Trentin-Südtirol. An istituzional moment ver za gea’ bider no en de òchsk jor va gschicht, ont ver za tschbinnen drau en bèrt va de ausònder autonomi ont en bos as de avn lònt tea’ miast hait ont en de zukunft.
Bail en to barn sai’ der president va de Autonome Provinz va Trea’t Maurizio Fugatti, der president van Provinzalrot Claudio Soini ont der president van Rot van lokalautonomi Michele Cereghini.
Men tschbinnt vour de ploudern va Umberto Gentiloni, professor va Zaitgschicht en de Universitet La Sapienza va Rom, as klòffen bart va “De kròft va de balsch demokrazi: òchsk jor va Republik”, ont va Giuseppe Tognon, president va de Fondazione Trentina Alcide De Gasperi, as klòffen bart va “Alcide De Gasperi ont de Autonomi. Gschicht van an internazional oa’negea’”.